正當梁振英為清場一事頭痕緊，當年同佢爭做特首而爭輸咗嘅唐英年，噚日傍晚就印印腳，去嘆佢最鍾意飲嘅葡萄酒嘞。
係人都知唐英年最鍾意飲紅酒，好多時佢都會被邀請去試酒會，噚日傍晚佢就畀面老友，一支公去咗中環一個葡萄酒嘅試酒會，現場見佢試咗兩杯唔同嘅酒，兩杯到肚已經面紅紅，全程心情靚爆。
唐唐身旁呢位仁兄就係葡萄酒品牌Pont Des Arts嘅太子爺龐天寶，唐唐透露，識咗龐天寶嘅爸爸好多年，𠵱家世姪開始接手公司，佢當然要到場支持。龐天寶亦落力向唐唐介紹幾款紅、白靚酒。
講得興起，唐唐自爆，其實佢唔只鍾意飲紅酒，其他酒類好似威士忌、日本清酒同埋德國啤，佢都會間唔中飲下。至於近年開始人氣急升嘅日本威士忌，佢都有聽聞，不過連佢都話𠵱家好難買到靚貨呀。