蘋果行政總裁庫克早兩個月出櫃之後，尊重不同性傾向人士呢個話題陸續喺商界發酵，滙控（005）行政總裁歐智華噚日出席亞洲LGBT（女同性戀、男同性戀、雙性戀及跨性別者）領袖高峯會時亦呼籲大家要尊重唔同性取向嘅人！
歐智華噚日提到英國業務主管Antonio Simoes係同性戀者，就係佢喺兩年前委任Antonio做英國業務阿頭，要佢管理5萬名員工。佢𠵱家跟Antonio同埋佢嘅另一半都非常熟絡。滙豐好需要Antonio呢類人才。
佢透露，滙豐英國喺工作申請表嘅性別一欄中，已經由兩項增至四項，分別是male、female、other gender同埋prefer not to answer，希望藉此消除跨性別人士障礙，同時會主動吸納唔同群體嘅客戶。
佢又大方分享，指滙控裏面有員工、客戶係同性戀、雙性戀同埋跨性別人士，集團會畀員工適當支援，若然員工唔願意調職至禁止同性戀嘅地區工作，集團唔會強求。