望住香港樓市，我睇唔透。於是呢晚James搵咗Peter仔出嚟Happy Hours摸下酒杯底，James講樓，Peter仔講女，各自表述，不傷和氣。
James：「我都唔明，依家啲樓則騎騎呢呢，但樓價呀，又連續兩星期新高啦！」
Peter：「係咁架啦！我夠唔明，明明阿怡呢個熟女，個格同個樣，都係Sell騎呢，但勁多男人俾佢搞到癡癡迷迷。上星期又有人送Hermès袋俾佢，Hermès Kelly呀，成20萬，又新高啦！」
James：「唔係喎，香港啲樓真係好騎呢。好似恒地（012）個新盤『倚南』咁，個玄關成37呎，只係比同單位個細房細3呎咋！
講真，見到《毒果》今日個頭條，大字標題寫『玄關大如睡房』，我真係火都嚟！根本個玄關咁闊先係正常，依家個問題係個房太細，大佬，睡房得嗰40呎咋！標題應該寫『睡房細如玄關』至岩！
好啦！睡房豆膶咁細，算！但好似長實（001）『嵐山』咁真係離晒譜，成個單位177呎，我覺得就算俾小矮人入去住，都係虐待囉，不過竟然都仲有人買？你話，係咪路？」
Peter：「聽我講，香港啲樓，就好似某啲港女咁，『應大唔大、應細唔細』。
UM…身材我唔講啦，我講嘅係眼界應該大，又唔夠大；應該細心嘅位，又唔夠細心。但偏偏你身邊總有一兩個兄弟，拖住件極品當係寶。
我見到佢哋一Pair行街時，個男嘅一邊挽手袋，一邊俾錢買新手袋進貢俾件極品。喺我眼前，就彷彿見到一個血淋淋嘅畫面，一隻豬，用皮鞭虐打梗個男人。但慘在，個男人仲要一路被隻豬打一路笑，個笑容甜到好似『Mandy Lieu肉墊』咁。
你覺得『倚南』68萬玄關好搵笨？但呢類女人仲搵笨，我都稱之為『倚男』，終身倚靠男人。再進化嘅港女，我叫做『倚男山』，倚靠男人坐食山崩。不過，都仲有好多人搶住要，吹咩？買騎呢盤，同娶港女一樣，都係旁人難以理解嘅『真愛』。」
James：「OK，咁你話啦，如果買咗『倚南』呢個巨型玄關單位，你話應該點用？」
Peter：「都話『倚南』似女人，咁就學女人！佢哋日日將幾吋粉撻上塊面，面具『朝行晚拆』；我哋就掉轉，『朝拆晚行』！即是安一張可以升高嘅床，日頭就升高，夜晚先放落嚟。」
James：「下，咁夜晚放將床落嚟唔好睇架！」
Peter：「車！啲女人夜晚落咗妝都唔好睇架啦，你咪又係一樣熄燈當睇唔到！你想個心舒服啲，咪當日頭係『美圖秀秀』咗嘅單位囉。你將你對facebook profile picture同見真人嘅落差，套落個單位度，咁你就接受到自己間屋『朝拆晚行』架啦。」
James：「咁又係。係噃，當年所謂『兒歌天后』李紫昕，將張床安喺馬桶上俾人鬧到癲，依家你呢個Design，真係岩晒佢何車啦。之但係，個床架日日升高升低，怕唔怕危險呀？」
Peter：「咁危險就實有架啦，不過應該安全過觀月．樺峯嘅。觀月．樺峯工作平台嗰塊鐵片，遇雨隨時生銹跌落街，咁照計你室內起碼冇咁易濕先啦。」
James：「下，觀月．樺峯觀塘重建區新樓來架喎，咁快就話怕跌鐵片落街？你估重建區，就可以起番重建前質素嘅樓呀？單位細，我忍，但質量差，就唔得！正所謂『是可忍，孰不可忍』！」
Peter：「如果女人批劏剝落，我都接受唔到，今舖我撐你呀！女人真係『是可忍，熟不可忍』。」
James：「係啦，聽完你咁講，其實『倚南』都OK呀，買『三房』單位送多『一房』。返去同阿怡商量下買唔買先。」
Peter心諗：「真愛，咪就係咁。」
完
by千頌C@堆填區
http://fb.com/winbigwok