民主黨年底改選領導層，今日截止報名參選。南區區議員、乳鴿仔區諾軒決定再接再厲，今屆再挑戰劉慧卿主席之位，希望為黨內帶來新氣象。至於被挑機嘅卿姐呢，真係你急我唔急，對主席位似乎志在必得，截至噚日都未報名，可能都係想最後一秒先壓軸登場。有白鴿黨中人話呀，如果卿姐參選，幾乎坐定粒六，難怪卿姐咁老定！
攞咗頭彩噚日率先報名參選主席嘅區諾軒，講明唔係「陪跑」，「我係認真參選，以當選為目標」，勢要同卿姐決一死戰咁款！佢話呢次決戰會主打兩大議題，以「從地區開始贏回香港」為口號，重點係做好明年區議會選舉工作，大嘆泛民選舉工程比建制派落後至少10年，係時候要改善，仲話白鴿黨嘅中國政策政綱不時進退失據，建議喺不涉歧視情況下提出香港本位同港人優先等建議。
司庫都想加入混戰
上屆後來居上、喺截止報名前先決定去馬嘅卿姐，唔知係咪食過翻尋味，贏得好歡喜，當八方噚日問佢係咪爭冧莊時仲話考慮緊，聲言：「有人叫我唔好去，畀後生競爭係好事。」但當然啦，黨內亦另有意見覺得，𠵱家政壇風雨飄搖，畀新人做主席風險好大㗎，希望佢連任喎。
查實除咗乳鴿仔戰卿姐，據聞現任司庫吳永輝亦想組名單加入混戰。吳永輝強調對卿姐做主席「有欣賞，冇批評」，但老土都要講句，有競爭先有進步，加上發現白鴿黨支持者多數係認同佢哋個黨嘅專業、理性形象，所以希望喺呢方面加強吓。至於副主席呢，目前以爭連任嘅羅健熙同新參選嘅尹兆堅呼聲較高，如無意外可以一新一舊做副手拍住上。
李八方
mailto:[email protected]