今季美職聯已經圓滿結束，周日上演季後賽總決賽，洛杉磯銀河喺主場迎戰新英倫革命，銀河一度被逼和下靠MVP羅比堅尼喺加時入波奠勝，以2:1贏波第5次成為總冠軍（圖）。今次係羅比堅尼加盟銀河以嚟第3次贏到總冠軍，亦為佢隊友當路雲送上最佳退休禮物。
今屆總決賽咁啱喺番銀河主場上演，踢到下半場由薩迪斯先開紀錄，但到完場前11分鐘，革命嘅泰亞尼建功扳平。比賽進入加時終於等到羅比堅尼發威，呢位陣中首席射手喺決賽前4場季後賽只係入得1球，但喺關鍵時刻始終要靠佢，喺111分鐘接應長傳，突破越位搞掂，以2:1擊敗革命，刷新紀錄5奪美職聯總冠軍，賽後成班球員仲high到喺更衣室滑水。新英倫革命就真係慘，至今5次打入總決賽全部輸晒，「千年老二」污名始終搣唔甩。
34歲嘅羅比堅尼加盟銀河4年，贏咗3次總冠軍，喺今年更加威水，贏完常規賽最有價值球員後，再獲選為總決賽MVP。另職業生涯贏過6次總冠軍嘅當路雲，亦會正式退下來，結束球員生涯。
識睇，一定係睇足英台【英波Live】：
http://soccer.appledaily.com
http://bit.ly/engballlive