韋達，過去永遠係馬迷寵兒，馬場上嘅主角，尤其快活谷國際騎師錦標賽，更令韋達留下唔少美好回憶，喺02、07及08年，韋達三度成為呢項賽事總冠軍，令佢聲名大噪。不過時移世易，韋達嘅年代已過去，今屆佢無望重奪騎師賽冠軍，因為根本唔入選參賽。到時韋達睇到一班各地好手，唔眼冤酸溜溜就假咯。
事到如今，韋達可以做嘅，就係喺騎師賽以外嘅場次盡量數糊，希望挽回面子，攞番個采。
其實今期韋達嘅座騎好有份量；先講「萬醒駒」，近兩仗跑同程谷草1200米，都好黑仔排12檔，結果仍攞到一季一殿，可見隻馬真係好弗，今次7檔點都好過12檔，評55分比上季贏馬時低咗12分，可謂競爭力十足。仲有尾場「定做領袖」，上次直路成支箭咁追上嚟，只輸一個身位得第四，試到準晒，拼後韋達唔放手繼續操，今次排4檔，未交代馬一定盡砌。而頭場「宇宙駿駒」同樣抽到內檔，雖然隻馬屢戰未勝，但話晒攞過7次亞軍，喺五班絕非下風馬，今次換韋達上去，分分鐘有突破。