我求大俠上網一睇，見到安祖卡路爾梅開二度？仲以為係幾年前啲舊聞嚟！點知呢位牛高馬大、成日俾人笑「銀樣蠟槍頭」嘅中鋒真係大發神威，喺星期日頂入兩球，幫韋斯咸主場以3:1搞掂史雲斯，佢未婚妻比莉亦喺網上叫未來老公加油！
領槌仔贏3:1 未婚妻大讚
唔知係咪受上月訂婚沖喜嘅激勵，卡路爾幫自己出番口氣，入波畀大家睇，仲要一嚟就梅開二度。卡路爾上次入波已經係上季嘅事，喺3月對新特蘭嗰陣入。今場波雖然韋斯咸先落後，但卡路爾真係好腰好腎好男人呀，爭頂冇得輸，搞掂晒史雲斯條後防，先喺41分鐘頭槌破網，追成1:1。韋斯咸同史雲斯都係踢法簡單直接，絕唔會禁區頂搓嚟搓去都唔射，場波下半場繼續高潮迭起，好似韋菲特邦尼就有腳中楣，令個波未能喺網中出現。
想唔到卡路爾66分鐘又顯強勁腰力，加埋扯到行條頸，再用頭槌入多球，幫韋斯咸領先2:1。之後史雲斯有門將法比安斯基領紅，士氣一洩如注，臨尾卡路爾仲用個頭助攻，畀迪亞法沙高射成3:1完場。見到未婚夫虎虎生威，比莉都好開心，喺Instagram度話：「射入兩球呀！繼續努力，AC！」當然唔係指AC米蘭，AC係安祖卡路爾英文名（Andy Carroll）嘅縮寫。比莉5月同卡路爾去杜拜度假，仲教男友做瑜伽，動作幾高難度㗎！話唔定全靠練瑜伽，卡路爾𠵱家先咁好腰力！
一掃「蠟槍頭」污名
咁我求大俠見到卡路爾重振雄風，都係開心嘅，雖則以前都寸過佢好多次，又水貨又蠟槍頭咁。但我真心好驚佢得一兩場貨仔，大家都知㗎嘞，卡路爾呢幾年出名玻璃腳，冇踢足全季嘅持久力，上季仲因為腳傷唞咗半年。
寫到呢度，我求大俠覺得今季韋斯咸好神奇，成績好到可以爭歐聯資格。喺領隊艾拿迪斯嘅訪問入面，終於搵到答案，原來佢就快約滿，「希望我哋保持到𠵱家嘅成績，我將會同主席傾吓續約。」即刻明晒！其他19支英超球隊相信都想大Sam快啲續到約，咁韋斯咸之後又可以變番做提款機。
周日尾場英超，阿士東維拉主場贏李斯特城2:1，李城由荷西烏路亞開紀錄，但主隊嘅施亞蘭奇勒同侯頓各入一球，幫維拉反勝。李城3連敗，領隊皮亞臣帥位危危乎。
識睇，一定係睇足英台【英波Live】：
http://soccer.appledaily.com
http://bit.ly/engballlive