「萬人迷」碧咸上星期來港，與老友樂裕民打骰嘅利標品牌（787）簽約合作成立新合營公司，呢個簽約儀式事前搞得神神秘秘，原來之後碧咸接受個別電視台訪問都零舍特別，唔使勞煩電視台，要由利標公司安排攝影師操刀，唔通擔心拍得萬人迷唔夠迷人？
喺訪問入面，碧咸話自己會「畀足120分努力去做」，唔會hea做，佢舉例話，無論係工作，還是為小朋友煮飯，佢一向都鍾意自己落手落腳去做。佢指，喺球場衝刺又好，做生意又好，成功都係冇捷徑，有少少運仔當然好，但最緊要都係有熱誠、膽識，同埋努力。
萬人迷碧咸係廿四孝老公就係人都知，次次露面做湊仔公，佢都會用強壯嘅臂彎抱起小朋友，等太太Victoria保持優雅。今次佢不經意講起，先至知道原來佢都會下廚，新公司不如考慮叫碧咸教煮餸，拍番套「12道．咸味」喇。