內地上月出口表現差過預期亦好，中證監溫馨提示也罷，內地股民對呢啲訊息去到無視嘅程度！上星期先啱啱講到，滬綜指年底目標3000點，分分鐘變成超短線的一周目標，話口未完噚日就一步到位，A股個市成交亦都一步到位，8,000億元好多咩，9,000億元唔少喇啩，仲未算，衝夠上1萬億元個勢都好似仲未想停。
中證監上周公佈上月24號（即係減息後首個交易日）至今個月5號，兩個星期日均成交金額7,561億元人仔，單計上個星期五超過一萬億元。
響資金市下，基本因素真係講嚟都無謂，講資金，股市要爆炒既時候，錢自然從四方八面湧過嚟，單計存款總額已超過100萬億元人仔，仲未計其他理財產品嘅資金同埋孖展。從資金角度黎睇，個市大把空間大把貨，淨返落黎嘅就係阿爺嘅肯首，過去幾日，中證監已開聲警告你班友，新華社又發文話個市「漲瘋」，表面證供係阿爺都唔想個升到黐晒線。
話雖如此，個市雖然升得急，但升唔夠一陣就一棍打返落黎又唔多合理，由得個市亂升，撻返落黎又會令個社會唔多和諧，且看今次阿爺有幾忍得。
流氓