四大內銀股都好鍾意搵番個本地財金猛人入董事會，好似中行（3988）有周文耀、建行（939）有梁高美懿，農行更一炮三響，有胡定旭、馬時亨及袁天凡。至於原本已經有思捷環球（330）主席「柯大俠」柯清輝坐鎮嘅工行（1398）似乎亦唔夠喉，準備搵埋證監會前主席梁定邦入局做獨董。
做過證監主席嘅梁定邦，𠵱家雖然做番律師執業，但佢同財金界一啲都唔脫節。佢除咗喺中證監國際顧問委員會委員，𠵱家亦都喺國壽（2628）嘅獨董，之前仲做過9年中行嘅獨董，斷估呢份新工對佢嚟講應該係駕輕就熟。
梁定邦入咗去工行幫手做獨董，日後去北京開會嘅機會應該都會多咗。梁定邦喺北京有自己物業，喺嗰邊又養咗兩隻狼狗同一隻流浪狗，相信將會有更多時間探愛犬。