【本報訊】旺角「鳩嗚團」昨晚10時半起步，熱鬧氣氛消退，逾百團友雨中默然爭普選，截至昨晚11時，警方亦暫未有出動武力。有團友表明會一直鳩嗚至真普選實現，有佔旺中堅則指若金鐘清場，不排除轉戰其他核心商業區，包括中環及銅鑼灣的大型商場。
「如果我哋走就係認輸」
昨晚是周一，鳩嗚人氣不及昔日鼎盛，延至10時半才夠人出發，任職生產管理的Leo表明，一日未有真普選，一直會鳩嗚下去，「10月頭我就一直係度佔領，日日收工落嚟，要一直繼續落去，如果清咗場我哋走，就係認輸」。他同意行動會影響小巴司機生意，「但冇辦法，始終係潮聯搞禁制令，同埋佢真係犯法，既然佢可以搞旺角個場，搞到流血事件，我哋咪去搵佢囉」。
他稱金鐘清場在即，周中會返回金鐘，「面對警察暴力，我哋冇可能同佢抗衡，但至少都要保護學生，幫佢哋撤離，佢哋一定揀朝早清」。他相信現時「鳩嗚團」缺乏年輕人，因他們均準備周三總動員應對警方。
另一「團友」鍾小姐曾分別在金鐘及旺角佔領區落腳，「唔覺得我哋影響生意，好多舖頭都話未清場前生意好過𠵱家，清咗場仲衰，個個驚警察，驚到落閘」。她表明鳩嗚無了期，「起碼佢（政府）打開道門，同大家對話，唔係淨係同學聯，係大家，你閉門的話，即係嘥氣，我哋梗係不滿」。她笑言已經把真普選的訴求交給金鐘，來旺角是因為不滿警方，「不過金鐘如果清，我哋會去中環，又諗緊撐銅鑼灣，我哋唔會再和理非非，和理非非一個月夠㗎啦」。
與友人一起鳩嗚的阿華同意，政府至少要回應巿民訴求，梁振英要交代為何用催淚彈等，「𠵱家個政府係拖字訣，搵警察做磨心，佢哋都唔想當值」。