A股明明上星期初，先講梗升破2700，點知連續4日，每日百點百點咁上，噚日破埋3000點大關，成個星期真係「瘋」繼續吹。你話真係一日100真係冇可能，但始終A股咁平，預計都係大漲小回格局。而家內地散戶潮興一個term，就係「倉井空」。意思係最近A股升到嘭嘭聲，唔少人高位建倉，不過買錯版塊，結果滿倉踏空。同樣情況港股都有出現，呢個moment，只要你有A股概念，就係咁升；如果完全唔關事，就真係sorry。噚日雖然好多人炒得好開心，但港股中有1,060隻股份下跌，買唔中版塊，到頭來咪就係「倉井空」。
中資金融股升爆廠，而家先追又冇咁大膽，不如搵其他版塊追落後。其中大連港（2880）有三大優勢！首先國家主席習近平大力推進「一帶一路」，上星期中共中央政治局提出，加快實施自由貿易區戰略。大家要知，阿爺上個月先同南韓傾好「中韓自貿區」。大連港位處遼東半島，直頭喺正南韓個門口，個位咁靚，完全食正條水。其二係而家AH價真係差太遠，A股較出股溢價超過1倍。大連港本身係港股通股份，隨住呢兩日A股咁旺，大連港H股應該要重新受重視。仲有係，天津港（3382）PB分別係1倍同埋1.3倍，但係大連港得0.94倍，估值落後。睇圖表，2.5呢個水平好穩陣，加上昨日突破旗型，有機會迎接新一浪，可埋定位等開飯。
Fifi
http://www.facebook.com/lovefrystock
本欄逢周二、四刊出