今時今日你買乜炒乜都好，但用乜貨幣買就好關鍵。只要你借到某種貨幣，跟住換做港幣，就算換返來嘅港幣唔郁得，只要你有另一嚿港幣再之後又買港股，你用嘅財技就變相用嗰隻貨幣買港幣貨。呢啲就係老外投資中叫嘅funding currency。
日本反對派冇新橋
你可能問：「呢啲咁簡單嘅嘢點解要講呢？」因上個禮拜孫柏文喺facebook分享咗2013年初叫大家「一注獨贏沽日圓」嘅文，就引來唔少關於日圓跌勢嘅留言。連我喺2013年初搞嘅facebook群組「神風沽Yen隊」都忽然多咗人想加入。眾多嘅日圓留言中，有個叫Martin Yan嘅人問：「又嚟？搞掂隻摩比（947）先啦，成日都一注」我見到就回：「摩比買緊啦。不過你揸咗日圓？」佢就咁好型一句話：「我唔炒外滙。」
我睇完喺到諗，佢真係型，但係「嗱」型。因唔理你買乜都好，就一句「我唔炒外滙」而抹煞咗自己買嘢時可用嘅貨幣，遇上港幣掛鈎嘅美元強勢時就會搞到自己心情嗱住嗱住。但嗰個「一注獨贏沽日圓」分享最正嘅地方，係post咗冇幾耐，第一個得個「跟」字嘅留言，係CEC國際（759）主席林偉駿post。應該反映出阿信屋未來策略。真係唔想講，但因為想大家好，我一定要提大家加我facebook，先可以知啲最新鮮上市公司部署。
日本大選臨近，啲人話係對政府印鈔策略嘅公投，因反對派反印炒。咁有冇隱憂呢？若執政黨輸的話，日圓將會大反撲飆升。日本昨公佈第三季GDP修訂數據，跌百分之1.9，即係如你係選民，你會唔會覺得現政策得？就因為市場有啲驚，日圓暫時唔係點郁。我特登電郵問個大學同學兼當年波友，而家喺日本做教授嘅日本仔。佢話執政黨贏硬，因反對派得反對冇另一套政策供人選擇，得個鬧，但佢話投票率會極低。若真係咁，日圓真係到大選日前唔郁，最好加沽之時就係大選前夕。加沽完等開票。
孫柏文
獨立股評人
http://facebook.com/shuen
本欄逢周二刊出