太陽飛馬門將謝德謙噚日迎娶靚空姐Manie，陳偉豪、黃耀富幾位球圈老友齊齊化身戥穿石；外號「Fu Dragon」嘅富仔更不惜犧牲色相，化身美少女戰士跳舞娛賓，場面搞笑又溫馨。
年僅29歲嘅謝德謙噚日踏入人生另一階段，同拍拖4年幾嘅空姐女友拉埋天窗。不過，想娶得美人歸同踢波爭冠軍一樣，都要過五關斬六將，所以阿謙就搵嚟流浪嘅黃耀富同南華隊長陳偉豪等，組成8人兄弟團「應戰」。連平時牙擦擦嘅偉豪都講笑話：「今日阿謙娶老婆，要出動到我哋球壇雙塔做兄弟，睇嚟嗰班姊妹都好難應付喎！ 」
$4,888抱得美人歸
富仔透露，姊妹團第一關就要班兄弟睇片跳舞，仲要Cosplay做《美少女戰士》，認真難搞。富仔仲大爆偉豪因為怕醜冇跳㖭；兄弟團過頭關後，阿謙就要玩騎膊馬，喺天花板上面搵返老婆唔同身體部位嘅相，然後用條脷舔張相落嚟；平時踢波金睛火眼嘅阿謙，又點會難到佢呢。
嚟到壓軸第3關，就係用腳趾喺盆冰水夾返9粒蓮子上嚟，輸咗就要食鹹竹蜂作為大懲罰，但兄弟團一樣冇有怕，兄弟之一嘅公民行政總監貝可泓，輸咗仲要食返自己夾過嘅蓮子㖭。玩足個幾鐘，加上阿謙畀咗4,888蚊嘅開門利是，終可抱得美人歸。
打完「上半場」，阿謙下半場轉戰沙田，喺馬場筵開26席，唔少球圈好友都有撐場 ，見證呢位港超「玩嘢王」正式成為老襯，從此被困。戥穿石之一、公民門將岑賓華為阿謙兩公婆作咗首歌，阿謙即場獻唱，場面感人。
識睇，一定係睇足英台【英波Live】：
http://soccer.appledaily.com
http://bit.ly/engballlive