呢個周末，唔少內地股民最關心嘅唔係阿爺減息、降準，而係王菲謝霆鋒港聚，千祈唔好出乜嘢意外。終於，鋒菲於周六重演世紀拖手，令股民放下心頭大石，A股周一繼續爆上。今年9月鋒菲驚世復合，被稱為呢輪A股大升嘅「核動力」，大家都不想斷纜。
有心水清嘅內地股民更發現，原來霆鋒的冤家陳冠希，亦有同樣光環。想滬綜指衝上萬點？冠希、栢芝快啲復合喇！
喺內地股市，「王菲效應」嘅威力，遠遠大過香港嘅丁蟹效應。1996年，王菲和竇唯結婚，滬指年半內升三倍。2005年，王菲與李亞鵬結婚，滬指兩年內勁升六倍。鋒菲9月復合以來，滬指已經升咗三成，以往績計，如果呢次肯結埋婚，A股應該仲有排升。
如果陳冠希復出嘅話，好可能一樣帶動升市。2000年，陳冠希首次參演嘅《特警新人類II》上映，滬指其後18個月內升六成；2008年初，陳冠希艷照流出，知名度大升，滬指死貓彈升一倍。其後陳冠希退隱娛樂圈，同A股一起進入低潮。
A股癲成咁，已經冇法用財經理論來分析，逼啲股民惟有睇娛樂版多過睇財經版。
李可強