禮拜三晚谷草國際騎師錦標賽之夜，採用A跑道角逐，睇番上季同晚賽事亦係用A跑道，賽果具參考性，當晚頭馬全部排十檔或以內起步，其中一至三檔已包辦逾半頭馬，可見內檔優勢仍大。至於跑法方面，雖然有「電訊超星」、「公証揚聖」及「環保戰士」後上贏馬，不過其餘頭馬都係守前三位入直路下建功，而且總共有五匹放頭馬勝出，證明擺前走始終着數啲。
今戰列陣馬中，第三場「滿貫豐采」及第六場「新力鷹」上季正是在谷草騎師賽之夜跑A欄放頭贏馬，今次又安排在此賽日上陣，雙雙抽得內檔起步，有力重溫好夢。此外，第五場「悅欣賞」兩次跑谷草A欄非冠即亞，均速馬結合跑道形勢，應可坐位望贏。