暫列聯賽榜第4嘅南華，噚日喺港會場晨操多咗位新臉孔，年僅23歲嘅「黑珍珠」前中甲廣東日之泉前鋒艾華，雖然細細粒，但曾經同佢喺日之泉拍檔過嘅陳肇麒同梁振邦，都讚佢速度技術兼備。
教練楊正光噚日因病請假，助教顧錦輝就話，呢位上季幫日之泉射入最多7球嘅喀麥隆射手，早前隨隊去三水集訓嘅時候已經覺得佢唔錯，聽日過埋體測後，好大機會成為轉會窗重開後第一簽︰「季初棄用迪馬達後已一路物色前鋒，畢竟要兼顧亞協同本地兩條戰線，增兵在所難免。至於啱啱先入籍香港嘅伊達，因為出戰亞協都要當外援計，所以除咗艾華外，都物色緊一、兩個本地兵。」
艾華亦好想快啲成為少林寺一分子，除咗英文，仲識少少廣東話同「煲冬瓜」︰「我第一次嚟香港，睇過傑志、東方嘅比賽，覺得佢哋實力唔錯，希望可以快啲效力南華啦。」
識睇，一定係睇足英台【英波Live】：
http://soccer.appledaily.com
http://bit.ly/engballlive