愛字堆噚日又出動，但唔係去撐警反佔中，而係去咗太古嘅facebook香港總部抗議。抗議由親政府團體「匯賢起動」嘅劉轉好率領，十幾位示威者中包括香港保衞運動傅振中，佢哋不滿佔中以嚟，多位網民喺fb發表反佔中言論，被人投訴到封鎖賬戶，劉轉好仲話，佢半個月嚟被封咗四次賬號，要實名認證包括上載身份證，先可重啟賬戶，私隱冇保障喎。
查實佢哋唔係首次投訴fb，之前有個「Facebook版主反滅聲大聯盟」，𠵱家又成立「Facebook用戶權益關注組」，叫苦主向佢哋求助。但今次示威佢哋都係用fb嘅「活動」功能吹雞，擺明反fb都無被block，話被打壓唔知有冇人信。