跟「榴槤乜乜乜」比，聖公會大公關說「行得咁前，令上帝尷尬」，極大機會爬頭，當選年度最賤。
將上帝拖落渾水，聖公會乘機渾水摸魚，跟鄺主教坐埋一條船的，開始不安，有做了水魚的惡感，又悔恨沒聽主教寶訓，落船時無帶埋那個在廚房朝桁晚拆兼扣起晒假期的菲傭一齊來。
上帝會因為你二次創作就揮動手上的神棍（假如有的話）罵你「再行就拉」？上帝去MK瘋狂鳩嗚會點？大家替「令××尷尬」無限發揮延伸下去：
「縮得咁龜，令子孫尷尬！」問責官員行會成員，個個爭住做雨傘運動的「局外人」，呃like。你們做到咁絕，一定有報應。
「出棍咁重，令美國尷尬！」警隊那身藍衣染紅染黑了，香港警察跟墨西哥黑警同一級數了，美國白警要加緊開槍殺黑人才有望跑贏。
還有：「共產黨咁nice，令移民尷尬！」「李大媽撐得咁狼，令狼女尷尬！」「tbb打壓得咁左，令環球時報尷尬！」「那一夜，旺角紅van咁惡，令導演陳果尷尬！」