呢個星期五（12日）係「樂壇教父」Uncle Ray（郭利民）90歲生日。佢老人家老當益壯，前晚一班港台歌手好友提早同佢賀壽，喺灣仔會展搞咗個「世紀之聲樂善行慈善晚宴」，一班歌手同Uncle Ray好友即場同佢切蛋糕，學友負責唱生日歌。
官恩娜被催生仔
一班樂壇前輩同後輩歌手，先後都有上台獻唱，未能抽空嘅歌神許冠傑就錄影咗一段自彈自唱《Just a Little》送畀Uncle Ray，仲有喺60年代由Uncle Ray一手提攜、當時紅極一時嘅樂隊Teddy Robin and The Playboys為咗賀壽再度合體，今次仲加咗幾位新成員，佢哋全部都係樂隊嘅第二代，好似泰迪羅賓個仔Jonathan，就擔任結他手，關楚耀（Kelvin）同爸爸關維麟亦係首度同台演出，擔任主音嘅Kelvin就話好少同爸爸溝通同合作，今次同一班前輩合作，仲見到佢哋好多「愛火花」，佢話：「我知道當年點解佢哋咁受歡迎，因為佢哋都好執着，好有火花，係愛嘅火花，我唔敢加入，只係做調停。」
官恩娜（Ella）喺晚宴上面都送咗首歌畀Uncle Ray，呢首歌就係之前佢送畀外籍未婚夫Juan嘅《幸福車站》，Ella之前公開婚訊，又扮大肚婆，所以有唔少人順勢向佢催生仔，佢話：「結咗婚睇吓乜嘢情況，有朋友畀個App我，話睇日子生仔，不過我唔會用，因為我真係冇所謂。」
撰文：馮仁昭
