每次金鐘傳清場，記者必到佔領區其中一個「景點」採訪。嗰度坐住一個肥佬，佢姓黎。肥佬黎聽到要清場，定過抬油，「傳係咁傳啫！我就唔覺得佢會咁做囉！」萬一警察殺到嚟，咁點算？肥佬黎未驚過，「咁咪畀佢拉囉！」
承諾陪學生至最後一刻
肥佬黎話政府「都想我哋爛尾」，可能拖字訣，只係清禁制令範圍，唔會清晒成條夏慤村。八方問佢坐咗七十幾日有乜嘢啟發，佢答：「好多人都好攰，市民對呢個運動有怨氣、反感，係時候要撤」。佢亦冇乜嘢留戀，「冇嘢唔捨得，運動咁長，一定繼續。攞件衫，攞個backpack就走得」。
肥佬黎成日呼籲學生退場，但自己日日喺佔領區打躉，因為佢承諾會陪學生留到最後一刻，牙齒當金使，所以冇同佔中三子一齊退，「三子做咗先鋒，做咗年幾都好攰。𠵱家變咗雙學嘅場，有乜嘢事可能要齊齊鞠躬㖭，我明白佢哋好難做」。但係佢先旨聲明，「最後一刻」講緊雙學退場，「唔等於熱血（公民），特登死人都唔走，我梗係唔會陪佢啦」。