劉嘉玲昨日49歲生辰，前晚舉行華麗派對豪花百萬在灣仔君悅酒店筵開12席與友同樂，廣結善緣的嘉玲，邀得過百好友一齊倒數邁進人生第49個年頭。派對現場，嘉玲像一隻高貴優雅的鳳蝶一樣，穿插在人叢中，跟朋友談天說地，開懷暢飲，連一向低調甚少應酬的梁朝偉為了嘉玲撐到最後，更罕有在派對上首肯擔任劉謙的魔術表演嘉賓，完成表演，相信嘉玲一定感動不已。
「真係想請李亞鵬」
嘉玲的華麗派對，巨星名人雲集，過往甚少出席畀面派對，最近跟謝霆鋒世紀復合後，再成為傳媒追訪的王菲亦專程到港出席老友派對，嘉玲自然心存感激，入席後，嘉玲在台上已經提起王菲，她說：「邊個賓客想上台唱歌，隨便，歌星們朋友更加歡迎，如果係我朋友會自動為我上去獻唱，但係有啲朋友，我開金口叫佢唱都唔唱㗎！就好似王菲咁。」然後嘉玲向阿菲的坐席一指，是一張空凳，嘉玲隨即說：「王菲唔係走咗呀！王菲真係絕呀！請佢來麻煩喇！前度又唔請得，後度又唔嚟得。」
開心派對過後，嘉玲昨日接受本報電話訪問，提到華麗派對，星光熠熠，她笑說：「我好開心，因為我啲朋友每一個都咁開心，頭盤未食，個個飲酒傾偈，係我最想見到嘅。」嘉玲更大讚老公梁朝偉說：「算係咁，都撐到最底，一年一次都要。」被問到有關王菲的言論，她坦誠地說：「我覺得我段speech係真心話，我真係想邀請李亞鵬，不過唔係好方便，我講嘅係真心話，我覺得阿菲唔會介意，佢哋都係我朋友，霆鋒我都有叫，阿菲話費事搞寸我個party，所以冇叫霆鋒嚟。」
志偉輪椅送上車
賓客離開派對時都盡興而歸，每次飲宴都被人抬走的曾志偉，今次都不例外，大約晚上11時，學友離開時，表示曾志偉十分清醒，估計會令大家失望，想不到兩個小時後，曾志偉竟然不省人事，坐在輪椅被一班工作人員護送離開。除了志偉，杜琪峯和林建岳都醉住走，杜Sir步出酒店時儍笑說：「飲到多到不得了！」半醉的林建岳慰問杜Sir說：「你點呀？」杜Sir即妙答：「死得！」
採訪、攝影：陳辰、徐錦池、馬建華
