騎師田泰安捧盃起孖咁過癮，郭能嚟個有樣學樣，第六場贏時廐「比卡超」捧走半島金禧盃後，第九場三班1000米直路賽靠告達理馬房之「陽明囍囍」添進賬，呢位英國猛將自製一口大熱孖寶。
「陽明囍囍」際遇有啲似「比卡超」，前仗贏、上仗輸，然後今日同是大熱取得今季第二捷，而且都係出自郭能手筆，「陽明囍囍」轉投告廄後五戰三冠一亞，清一色跑田草一千米，成為新晉直路賽專家之一。今場第二名爭持激烈，柏寶騎半冷門「幸運明星」抽直路賽最下風之一檔，但仍後發先至與「陽明囍囍」埋Q，跑第二好有交代，在港兩戰兩亞未甩過Ｑ；落飛冷馬「氣勢如虹」姍姍來遲僅僅追過「如虎添翼」得第三，阿叻陳百祥名下之「如虎添翼」末段遲遲未能望空，由蘇狄雄跑梗頸四。
「陽明囍囍」馬主乃百億富豪黃健華之子黃僑福，賽後與貌似藝人梁琤的太太一齊高興地拉頭馬，他說:「『陽明囍囍』上仗直路賽落第，因為郭能與對手鬥燒，牠利跑新鮮，拼後休息足夠，養精蓄銳才再戰，加上郭能吸收經驗，今仗沒有搶得太急，故有好表現。加分後估計下仗仍留在三班，有望再獲佳績。」