城中富豪呂志和旗下嘉華國際（173）近日搵嚟警務處前助理處長黃敦義，出任集團企業事務副總監。警隊高層加入上市公司都唔少，好似前「一哥」曾蔭培係新創建（659）執行董事。究竟邊個拉線搵黃sir入嘉華？答案竟然係互聯網。
黃sir同華華講，佢喺建造業議會總監個位夠鐘離開，但仍然想繼續工作，於是上網搵工，就搵到嘉華呢份工。佢話嘉華吸引之處係對員工好，「每個月都有啲小驚喜畀員工，令員工感到窩心，好似派蘋果等水果，有時又派萬寧100蚊購物券」。
黃sir曾經係警察公共關係科（PPRB）嘅阿頭，2006年退休後，就去咗建造業議會做培訓及發展總監，負責幫手招聘年輕人入行。佢加入嘉華任務之一，係推動集團嘅社會企業責任（CSR）。
老婆方安妮任地監局
講開又講，黃sir嘅靚女老婆方安妮曾任職警隊27年，今年出任地產代理監管局執行總監。佢哋兩公婆離開警隊後，都做同地產相關嘅行業，真係蹺。方安妮有「殺雞女督察」外號，睇得又打得，仲係烹飪高手方太（方任莉莎）嘅女兒。