頭兩場三重彩都有大熱門份，第三場更加開埋大熱Q，首次熱門「飛來猛」及「藍天飛馬」分別跑第二同第一，14駒場合連贏開最熱嗰瓣，雙「飛」Q僅得3.6倍，第三名則係大冷門「琪麟穎」，三重彩有三千幾蚊派全靠佢。反觀「有鬥志」44倍欲爆冷不成，沿途守好位下頂唔住三甲馬衝刺，WP齊撻梗頸四，賽後騎練巫斯義、文家良露出一副慘樣。
「藍天飛馬」上仗韋達操過唔騎，結果99倍馬初出用賴維銘殺入大冷Q腳，呢次韋達親自操刀，閘前畀落飛黨喪插，最後一分鐘仍約5倍，一注約400萬大錢打到得番2.6倍開跑，僅次於2.5倍「飛來猛」，「藍天飛馬」位置更只得1.1倍大熱，睇飛數有人信心十足。跑落以「藍天飛馬」表現較佳，衝贏「飛來猛」補中開齋，落飛黨扣本後單是獨贏彩池已獲利約650萬。韋達昨日(6日)在澳洲歷史性在當地贏一級賽，凱旋而歸今日繼續有馬贏，連勝五次本地賽事；反觀「飛來猛」就繼續齋P冇W，在港四戰仍未贏過。
「藍天飛馬」練馬師徐雨石表示，今場對手不太強，同場不少三歲馬未熟，「藍天飛馬」雖然也是三歲，但本身比較早熟，所以佔有優勢。徐雨石笑言暫時沒有計劃部署此駒進軍新馬錦標，因為「怕唔夠人跑」！