學民幾名成員絕食多時，但專責政改嘅政務司司長林鄭月娥，對呢班細路仔睬都唔睬，卻周圍去探其他細路哥！
佢前日現身紅館，同終審法院前首席法官李國能等，同約萬名嚟自140間學校同團體嘅參加者，一齊jam歌演繹新版《歡樂頌》。其實呢個活動係青協「譜Teen同唱」青年音樂培訓計劃搞㗎，計劃由馬會贊助；賣力同年輕人大合唱嘅林鄭，最後仲話要「回一回氣」，而呢個活動最終刷新「最多人在電台現場直播中合唱」嘅健力士世界紀錄。
唱完歌仔，林鄭噚日拍住勞福局局長張建宗喺兒童發展配對基金嘅聖誕頌歌節開幕同一班細路拖手仔；忘卻學民仔嘅佢，玩得不亦樂乎。據知今年有12名高官同公務員頌歌隊會殺入醫院，向病人傳送聖誕佳音。