英皇國際（163）賣樓最鍾意搞綽頭嘢，最近佢哋準備開賣西環新盤維港峰亦都唔例外，繼搵咗才子陶傑為樓盤命名之後，佢哋再借影帝謝霆鋒過橋吸強國客。
適逢霆鋒同王菲復合後首度現身香港拍拖，夠晒話題性，英皇當然要食正條水，負責賣樓嘅執行董事張炳強（Donald）噚日就話，見到有好多強國人想喺香港置業，所以決定首3名內地買家可以獲謝霆鋒頒發獎品。至於買樓可獲頒乜東東獎品，Donald話要保持神秘感，唔肯講。
奇就奇在，維港峰明明位於港島干諾道西180號，何解港人就算一擲千金買樓，都冇機會見港產明星謝霆鋒一面，只係得首3名內地買家有份？係咪想挑起中港矛盾先？