上周內地A股充滿鑊氣，先有大摩嘅未來年半升一倍預期，後有社科院指明年或見5,000點，大行及各類研究機構嘅預測越來越牛，內地新開戶人數及融資餘額亦急速上升。
至上周五，內地滬深兩市，單日成交金額破一萬億元人民幣，打破歷來紀錄，仲創下全球單一國家單日成交金額最大嘅紀錄。滬深300指數在兩周升逾兩成，明顯地泡沫已經形成，好多人一聽到資產泡沫就驚，但身處充滿泡沫嘅年代，最重要係學會喺泡沫出現時上車，等待泡沫越吹越大，直至爆破前落車，正如索羅斯所講，當發現泡沫時，佢會趕緊加入，為火熱嘅市場添加燃料。有追本欄嘅朋友，都知我揸住華夏滬深300（3188），見到A股越升越快，對應策略係等待轉勢訊號出現才沽出。我有一套高位套利策略，但大家未必學過，惟有用一些坊間招數，像成交金額連續兩三天大幅縮細，同時指數出現微跌，又或者係特大成交金額日子出現明顯嘅單日轉向，希望不中亦差不太遠。
下一個當炒板塊？
內地A股擺脫多年弱勢，多個金融板塊已炒到不亦樂乎，內險、內銀及內地證券股已大炒一轉，但多隻相關股份上周五創新高後，內地收市後回落不少，似要回氣。反而本地證券股受到上周平均成交金額逾千億港元刺激，亦炒了一轉。這個時候，作為一個投機者，最重要嘅就係推算，下星期到那個板塊轉旺。
眼見不少內地股民賺到快錢，直線咁諗，應該可以帶旺奢侈品銷售。不過習李領導上台後，過去反腐兩年，中外奢侈品股均跌到散晒，即使有資金短線炒作，亦難敵期內被段段鎖死嘅蟹貨，好難大升。另之前熱炒嘅AH概念股可以係一個被鎖定嘅目標，始終水向低流，一個牛市總有股先升，總有人想追落後。稍後或者有較遲入市嘅內地人，發現很多內地股已較兩個月前貴三成以上，會尋找未炒嘅股份，只要焦點一放到本地上市嘅H股身上，暴力地炒爆嘅機率很大，所以這個概念可留意，但要等有訊號才出手，暫時要等等。
此外，資源股上星期反彈，我在DBC及個人facebook示範了一轉短炒石油股call，已埋單，兩日升六成，都幾和味。當然衍生工具風險高，未必人人適合，但一理通百理明，石油長期跌勢未改，但稍一喘定，借啲意就可發難，航空股、航運股，暫時敬而遠之。同理，滬港通後，港交所（388）也是沽家對象，連日大成交，亦無助其重振往日雄風，我覺得下支陰燭是關鍵，睇淡後市可借勢沽空；然我是好友，情願陰燭後突破近幾日高位，博港交所後上，若怕蟹貨太多，信達國際（111）及時富金融（510）都甚為落後，破近日頂都可作短炒對象。
如果唔喜歡扒逆水的朋友，中央放水始終係內房受惠，近日各路股價波濤洶湧，唯獨內房穩步向上，喜歡追勢的朋友，世茂（813）同潤地（1109）都係中流砥柱之選。
張士佳
註：筆者持有華夏滬深300、華潤置地。