阿里巴巴創辦人馬雲出名多金句，佢早幾日喺北京出席浙江企業商會會員代表大會時，竟然勸告企業家唔好只聽信經濟學家對未來嘅判斷，唔通佢想話經濟學家嘅預測多數唔準確？
馬雲應該都怕此話一出，俾一班經濟學家群起而攻之，劈頭就話自己對經濟學家好尊敬，指經濟學家通過對過去嘅總結，發現商業模式，再去預測未來。
不過，真係落手落腳做生意嘅企業家始終最能夠感覺到經濟嘅變化，佢認為企業家喺判斷市場走勢同埋掌握機遇有自己嘅優勢，應該信自己的判斷。
佢發現近幾年經濟形勢較差嘅時候，企業家偏向聽經濟學家嘅預測，佢反而認為「如果你這個時候還去聽經濟學家的預測，你的災難就大了」。馬雲呢番說話雖然寸寸哋，但佢確實有實戰經驗，比較齋講齋估嘅人的確更有說服力。