「歐冲BB」威過C朗！？首位港人登陸里斯本加盟葡甲葡萄牙體育會嘅歐陽耀冲，周日喺fb貼文，展示自己上月首次接受當地報紙《葡華報》嘅訪問，文中更以「偶像級明星」形容呢位前港足隊長，風頭直情勁過地頭蟲基斯坦奴朗拿度（C朗）㖭呀！
首次接受《葡華報》訪問
年尾流流，又係時候總結過去一年嘅體壇重要新聞，今夏除咗有迪馬利亞轉投曼聯、巴洛迪利轉投利物浦之外，仲有一單最多港人留意嘅重要轉會新聞，就係先後自費去荷蘭同葡萄牙試腳嘅澳滌中場歐陽耀冲，成為首位登陸葡甲嘅香港球員。
雖然「神之子」自今年8月加盟葡甲嘅葡萄牙體育會後，至今仍未曾為一隊上陣，但呢位前港足隊長，喺里斯本都備受當地華人關注。歐冲周日喺自己fb貼文，仲話自己上個月首次接受當地中文報紙《葡華報》訪問，風頭一啲都唔比喺當地土生土長嘅皇家馬德里球星C朗輸蝕㗎。
註冊問題1月處子戰
事實上，睇番嗰份報紙嘅報道，介紹歐冲同一班外流當地嘅國內球員，篇幅有成大半版，當中更特別以「偶像級明星」，形容喺09年以隊長身份帶領港隊歷史性勇奪東亞運足球金牌嘅歐冲。更重要嘅係，報道話歐冲好大機會喺下個月就可以為葡體會一隊披甲︰「據俱樂部（球隊）相關人士介紹，因註冊、報名時間原因，歐冲將無緣喺近期嘅俱樂部比賽，現正隨隊積極備戰，1月份開始即可報名參加下一階段聯賽。」
年僅25歲嘅歐冲，噚日喺fb亦坦承話因為遲咗註冊，所以仲未可以上陣，但去咗葡萄牙近5個月，走訪過唔同地方後，已經開始適應當地生活，「葡文班已上到中級，識基本對話同寫。」佢仲講笑咁話，𠵱家一個人住，餐餐自己煮隻燒雞嚟食，加上呢排密密踢友誼賽，寓賽於操，唔多唔少都大隻咗啲。且看呢位「港產C朗」，下個月可唔可以為暫時排葡甲尾4嘅葡體會處子上陣，為港爭光！
識睇，一定係睇足英台【英波Live】：
http://soccer.appledaily.com
http://bit.ly/engballlive