佔領運動啟動以來，Beyond經典金曲《海闊天空》成為佔領區「K歌」，皇仁書院舊生、平機會主席周一嶽上周五返母校慶祝畢業50周年 （佢1964年畢業），亦同14位同學仔一齊高唱《海闊天空》（圖）。獻唱之前佢仲話，呢首歌好感人又激發感情，叫皇仁仔爭取任何嘢都唔好犯法，應該和平、理性，佢仲趁勢話首歌有四句「原諒我」，叫年輕人做嘢時要反省吓，點做先至啱。
其實大師兄周一嶽喺400個同學仔面前獻唱時，不知幾咁投入，仲喺尾聲和音再和音「哦哦哦」，「哦」到班同學大叫「安歌」，揮晒手幫佢打拍子，熱鬧氣氛同喺紅館開個唱有得揮。