上月滬港通開車典禮，特首梁振英以主人家身份致辭時，曾經提到香港要做「超級聯繫人」，仲以為689（或其「智囊」）係龍珠fans，懶得意咁將「超級撒雅人」改成「超級聯繫人」，心諗kai是無得醫，都係一笑置之。
點知到上周接受本地財經報紙專訪時，689再煞有介事地叫香港人要做「超級聯繫人」，仲自創「CIO」（Chief Information Officer）和「CKO」（Chief Knowledge Officer），不過呢次我再也笑不出，甚至係憤怒。
梁特首，你怕阿爺怕到唔敢為港人爭取普選，都算。但在阿爺相對寬容的經濟領域，你竟然點條黑路畀港人行，你係真心膠、未瞓醒、抑或全心靠害？
根據訪問內容，689將「超級聯繫人」叫做super connector，說穿了即是做中間人、扯皮條。
然而互聯網修正資訊不對稱，全球各行各業中間人面對「去中介化風險」（Disintermediation risk），股民直接網上落盤、服裝品牌直接返大陸搵廠落單，這種大勢一去不回。
痴痴的689一廂情願籲港人做超級扯皮條，另邊廂阿爺「𡁻完鬆」條腸已畫晒出來。上個月中韓簽定自貿區協議，望落唔關香港事。
查實今年頭10個月，每10件韓國貨入口香港，有7件都係轉口返大陸。自貿區有免稅安排，將來呢7件韓國貨仲要經香港嗎？其他國家自貿區會陸續有來呀！
香港「中介人」老本只餘下金融一瓣，但講真啲，阿爺透過香港搞滬港通、離岸人仔中心，並非永久老獨，將來會複製到其他地方。梁振英推銷「超級聯繫人」大夢，留返嚟催眠自己，否則要搵人摑醒佢，香港才有救。
何淑茵
mailto:[email protected]