二十年後香港由甚麼人士接班管理政府，成為特首及問責局長等等，左丁山點都諗唔到，有人先天下之憂而憂，好似梁愛詩咁，話到明唔放心俾今日嘅青年人管香港喎。其實唔放心又有乜嘢辦法吖，梁愛詩都咁老咯，唔通佢仲有心有力今日開始就培養一位三十五至四十歲嘅才俊，訓練佢做未來特首咩。如果真係，可向日本取經，肥仔K在佢嘅專欄寫過，日本Panasonic創辦人松下幸之助生前成立一間「松下政經塾」，專門招收、訓練政治人才，學員多數係二十二至三十五歲男人，入校讀完後，走進政壇，逐步爬上去，自一九七九年至今，畢業生不到四百人，好多都做咗議員、市長，甚至首相，如前首相野田佳彥，自民黨視松下政經塾為人才少林寺。
梁愛詩只要振臂一呼，要愛國大亨捐錢，話都冇咁易，相信可隨時募集三四億元，辦一間「愛詩政治經濟研究所」，向本港大學畢業生及民建聯、工聯會招手，一年收十零個，人人免學費兼有每月14K生活津貼，向佢地灌輸愛國愛港思想及政治行政管理，每一位學生畢業後必須從政，由競選區議員開始，二十年後或者可以出到一兩個令梁女士好放心嘅特首人才呢。
最弊嘅係，時下中學尖子去讀法律、政治，入完中大港大可能已經學壞腦咯噃，俾戴耀廷教完，唔係愛國愛港人士㖭，怎麼辦？明年加入特區政府嘅新一批AO，駛唔駛政治審查，曾經參與佔中者，一概肥晒佢地呀？（小註：左丁山大學畢業之年，考幾份政府之乜O物O，全部肥晒，面試都冇機會，故此好佩服入到政府做事嘅同學朋友，佢地應該係叻左丁山好多嘅。）但恐怕如此一來，二十年後，不知有甚麼真正人才可以有資格晉升做常秘或者局長呢！仲有一樣，上星期碰到幾位年輕專業人士，既士嘜又學有所成，問佢地來自邊間大學，點知原來全部係澳洲籍、英國籍、加拿大籍、係冇資格做局長或特首嘅。其中一位話：「唔到我地揀嘅，三十年前父母移民加拿大，我在多倫多出世，咪揸加拿大護照囉，一畢業我就走返嚟香港咯！」另一位就話四歲隨父母移民澳洲，二十幾歲考到會計師資格就回流香港，佢地話有好多朋友有相同背景，故此佢地唔會從政或加入政府。梁愛詩請注意嘞，呢類叻仔叻女唔可以成為治港人才，本地大學生又信唔過，點好呀？