意大利騎師嚟得香港，件件貨真價實，好似杜滿萊咁，呢日好快已經起孖，先後幫第二場苗廐「皇龍動力」同第五場孫廐「優勝」贏泥地開齋，兩win過關有近60倍，相當和味！
「優勝」有啲似第四場由田泰安爆冷開齋之「大明珠」，都是久未交代之自購馬，前駒乃德國自購馬，前季82分入口，上季尾泥地千八米跑過一次第二，其餘出賽全部三甲不入，今仗初配杜滿萊跑泥地1650米，結果後上一攻而破，7.1倍綠燈win順利開出，大熱門胡廐雷神座騎「威勢之寶」影相飲恨做阿二，季軍落喺田泰安操刀之「大合照」身上。
今場跑到直路末段風起雲湧，先係「名列前茅」發難突圍而出，冇幾耐「威勢之寶」喺外叠如飛殺上，連埋「大合照」亦都衝得好勁，三隻馬鬥埋一舊，但突然間「優勝」不知在那裡殺上，馬群中間幾步之內透出，結果後發先至影相險勝，「威勢之寶」返四班出擊，雷神騎到一絕都係贏唔到，第二季在港服役仲未入過凱旋門，幕後認真冇運。