A股進入狂牛境界，最癲係券商股，差唔多日日升停板。
最誇張嘅係上周四，除咗停牌嘅海通證券、西南證券之外，其他17隻券商股全部升停，簡直係十年罕見奇景。
咁好形勢走去停牌？俾着你係呢兩間公司股東，都會鬧爆管理層喇！於是，A股上周五再加演一幕奇景中嘅奇景：公司重組仲未完，竟然可以復牌。「十九羅漢」全部歸位後，再一齊全部升停。
西南證券喺9月，因為要搞重組，所以開始停牌，呢兩個月來內地券商股已經全部升超過100%，惟獨佢冇份。
公司喺12月4日發通告話，大股東仲傾緊重組，需要再停牌20日。但見到當日券商股咁狂升法，西南證券終於忍唔住，喺12月5日再發通告，自打嘴巴話，「鑑於近期股票市場交易情況，為更好保障投資者權益，公司今日復牌」。
至於海通證券，喺12月4日宣佈要收購葡萄牙聖靈投資銀行而停牌，見咁嘅形勢，知道再停牌就係儍仔，同樣拿拿臨喺12月5日復牌，趕住喺散水前食埋個升勢。
大小股東齊齊happy，至於有冇違規就話之佢，搶到錢先係硬道理。
李可強