樓價破頂再成熱門話題，市區400呎上車盤入場價逼近500萬元，環球狂放水搞到百物騰貴，係咪火棒上帝先知。但可以肯定的是，只要SSD與金管局收緊按揭的緊箍咒仍在，資金勢繼續向細價盤傾斜，上車難度將越來越高。
筆者友人A君8年前兩口子開始租樓住，四年多前曾心大心細，想入市購買將軍澳半新樓兩房單位，惟最後因為想等個市跌返先買，至今仍望穿秋水，下月約滿又要同業主講數。粗略估計，A君八年花費90萬元租金，若計埋四年前入市的機會成本，總代價近三球。最慘情係，其目標單位造價已由當年嘅300萬升到560萬，以最多借360萬樓按計，首期連使費最少要200萬元，唯有繼續捱貴租，這正是現時很多無殼蝸牛的寫照。
日圓終極一跌
置業是人生重要決定，對與錯皆影響深遠，唔似市場操盤咁可以NG多次，後知後覺高追仍有斬獲。以滙市為例，美國上月新增職位三年最多，造就美滙延續五個月升浪，上周五升至89.46的八年高位。
日圓續成地底泥，上周五曾大跌191點子至121.69兌1美元。日本央行10月底加碼量寬後，日圓至今已貶值10%，技術上早呈超賣，但強橫的美國就業數據，提高市場對聯儲局下周議息修改低息指引的期望，日圓年底前恐終極一跌，但逼近124要識走。
奇兵
本欄逢周一刊出