本港華資企業富二、三代當中，會德豐（020）太子爺吳宗權出名係運動健將，原來新鴻基地產（016）大股東郭炳江位公子郭基煇（Adam）都跑得下，噚日陪阿爸喺ICC跑樓梯，以黑色背心、短褲亮相，令人眼前一亮，輕易搶晒阿爸鏡喇！
快阿爸8分鐘完成賽事
31歲Adam雖然2008年已經加入新地，2012年中更加開始成為阿爸郭炳江嘅替代董事，但係一直保持低調，極少喺傳媒曝光，新地每年兩次業績會、一次股東會都見唔到佢身影，最近一次高調露面應該係今年9月富豪訪京團，新地係由Adam做代表上京。
噚日係新地第3年舉行「新地公益垂直跑─勇闖香港ICC」，各項賽事嘅跑手由起點8樓走上2,120級樓梯，到達天際100香港觀景台，郭炳江同Adam就係參加下晝嘅「滿Fun體驗賽」。
開跑之前，郭炳江已經不斷揚手示意，叫Adam同其他董事一齊企喺最前頭起步。賽事一開始，Adam就一支箭跑咗去，輕易以22分鐘跑完全程，比阿爸快8分鐘左右，郭炳江以29分36秒完成。今年男子精英組冠軍以11分56秒跑完，Adam之前練過幾次就上場，以業餘水準嚟講都算交到功課。
Adam持有美國史丹福大學管理科學及工程學士學位，仲有哈佛商學院工商管理碩士學位，畢業後同好多富二、三代一樣，做過投行賓架，冇耐就去新地學嘢嘞。其實𠵱家好多本地家族企業都陸續交棒，俾二、三代多啲見傳媒，郭生都咪收埋Adam喇。
李華華
mailto:[email protected]