財經事務及庫務局局長陳家強與財經界佐治古尼（George Clooney）緣慳一面呀。
話說陳家強上星期出訪歐洲，去咗巴黎、布魯塞爾同埋倫敦推廣香港嘅金融優勢。佢去到英國當然要會一會英倫銀行嘅高層喇，英倫銀行行長卡尼（Mark Carney）一直俾人話佢勁似荷李活巨星佐治古尼，可惜卡尼一早話咗有事在身，陳家強上星期去英國，英倫銀行只能派出副行長Jon Cunliffe與陳家強會面，局長今次因此冇得同財經界佐治古尼嚟張合照㖭。
講番陳家強呢次行程，佢話講香港嘅金融優勢，咪即係走去推銷開通冇耐嘅滬港通囉。據聞歐洲嗰邊嘅銀行與投資業界人士都好有興趣，真係向局長問咗好多技術性問題，官員就多數對政策感興趣。