賭王二房長女何超瓊（Pansy）、何超鳳及四房長女何超盈前晚齊齊現身灣仔演藝學院的友誼社慈善ball，同場還有汪詩詩、恒生新抱何培倩、謝玲玲、細劉劉鑾鴻夫婦等。當中大會更安排了8位富二代行珠寶騷，包括有Pansy三個契女曾昭怡、曾昭令及曾昭亮、邱德根孫女邱詠麒、超盈外，更有超鳳的19歲大女何鍶珩（Beatrice）等，Beatrice更是首度登ball場處女行騷，她雖是年紀最細一位，穿上鄭兆良設計的低胸裙未有怯場，表現淡定，可算是賭王靚三代的生力軍。
Beatrice現於美國長春藤之一的名牌大學普林斯頓大學讀第一年，記者問到超鳳對女兒的表現，她表示：「佢唔緊張，好大方自然，之前都有喺屋企練吓，都有問超儀點擺rock味道嘅甫士。」問到她女兒會否有興趣做幕前定幫手家族生意，她表示：「畀佢自己決定，𠵱家都係讀緊第一年未揀科，等佢畢業出去做吓嘢攞吓經驗，佢之前都有喺外國啲銀行做吓暑期工，仲話儲咗錢請我哋食飯。」
賭王已出院心情OK
超鳳透露賭王已出院返大宅休息：「佢OK，明白要保重生活，心情冇乜點，佢脾氣一向好。」此外，問到汪詩詩會否幫手為妹妹圓圓的女兒搞百日宴，她笑言：「佢𠵱家忙緊湊BB，好enjoy呢個時間，會搞百日宴，但就未知係以乜嘢形式進行。」
採訪：黃曉妍
攝影：陳慧安