唔知係咪唔抵得自由黨田少拉隊探學民兼轉達同政府見面要求，獲市民掌聲，相反自己話過做學界同政府對話中間人又冇人理，新民黨主席葉劉淑儀噚日帶着醋意不點名批評自由黨此舉「搞小動作、擺姿態扮親民」，激到自由黨榮譽主席周梁淑怡紮紮跳，反責葉劉批評人之前，諗吓自己做過啲乜先！作為花生友，有乜嘢好睇得過，兩位火爆哥師奶隔空開拖？
前年選特首已互片
其實呢兩位阿太，唔係第一次互片。2012年特首選舉期間，周梁大爆葉劉向該黨拉票時講過：「梁振英會害人，我唔會害人。」葉太即時火爆反駁呢個係競選時攻擊對手嘅策略，兩太喺電台烽煙節目由早片到晚，精采程度拍得住𠵱家香港電視嗰套《選戰》，成為一時佳話。
估唔到事隔兩年，兩太又嚟料。話說噚日朝早葉劉接受電台訪問時酸溜溜話：「學生想乜嘢，政府知㗎啦，使乜你做中間人？」暗批自由黨話做中間人拉攏對話只係擺姿態、扮親民，強調對話要以《基本法》為基礎先有意義，否則無謂搞「小動作」。
聽到葉劉咁講，周梁火都嚟埋，晏晝出席港台節目《城市論壇》之後，代田少還拖，質疑葉劉用陰謀論睇人。佢話明白議員做任何嘢都可能會被人用有色眼鏡去睇，但強調自由黨立場好清楚，佢哋想見乜嘢人、就從心而發去見，希望藉住對話，等大家唔好各持己見，反責若果有啲人只識批評人，「咁我又問番呢啲人，又做咗乜嘢呢？」寧得罪小人、莫得罪女人，係咪好有道理呢？
李八方
mailto:[email protected]