先講另一位姓伍。話說80年代，小學生閒聊，同學講到電視新聞結尾，有個叫伍晃榮嘅體育報道員，旁述搞笑抵死，自此一得閒，我就會睇體育新聞報道，為嘅就係嗰份過癮，呢個習慣一直到伍晃榮仙遊。之後，發現有位同姓仁兄，繼承咗伍先生之位，功力雖未及盲俠深厚，但亦有番兩度；閒時，都會捧吓場，就算本港政治新聞更好笑。
直至09年，微博與家謙（圖）互相關注，之後更喺吹水局相識，至發覺此君健談好玩、講嘢抵死，又會好文藝咁睇吓舞台劇，再加上高大靚仔，我只歸納出3個字：媾死女，幸好伍生好快結婚，失望嘅女士們可以搵我傾訴吓。
同家謙嘅話題總離唔開兩樣唔關體育事：西環同台山。西環，乃佢成長地，我同一班喺西環成長過嘅朋友經常懷舊同慨嘆今日之變。台山又關咩事？原來家謙又係同鄉（台山伍氏乃大姓，其他有美心集團創辦人同伍詠薇等），佢心情好仲會講幾句台山話，好笑，我曾經強烈要求佢報體育時漏兩句出嚟。
到今日家謙離巢消息一出，大家又惋惜一番，要知道此君報道體育，有抽水有潮語有諷刺有幽默，快樂布施也。CCTVB新聞已經出緊事，如今再失此猛將，替觀眾可惜之餘，亦見家謙有此決心表示支持。
伍晃榮嘅哲學係，將當年體育呢類小眾嘢，用幽默形式去滲入群眾，𠵱家除咗家謙，連收費台都有玩幽默，港人之福也。
梁栢堅
填詞人+彩池人