日聯煞科，賽果令人大跌眼鏡！3支爭標球隊全數失分，大阪飛腳雖然被德島漩渦悶和0:0，但全靠名古屋鯨魚幫手，反勝浦和紅鑽2:1，飛腳得以驚險封王，今季兩冠在手，力爭成為3冠王。
賽前飛腳與紅鑽同得62分，前者得失球領先7球，而第3的鹿島鹿角就得60分，所以只要飛腳可以在上周六的煞科日作客擊敗榜尾、早已篤定降班的漩渦，基本上可不用理會其他對手，肯定封王。紅鑽就主場對鯨魚，該仗由西村雄一執法；鹿角則迎鳥棲砂岩，3場比賽同時開波。起初，冠軍的天秤向紅鑽傾斜，他們兩分鐘就靠槙野智章開紀錄，領先鯨魚1:0，而飛腳就一直未能打破僵局，如果維持這個形勢的話，紅鑽將反壓飛腳封王。
紅鑽反勝為敗失冠
戲劇性的場面在下半場中段出現，72分鐘，鯨魚的牟田雄祐入波，紅鑽被追成1:1，完場前永井謙佑為鯨魚入多球，紅鑽由贏變輸以1:2落敗，冠軍就此流走。儘管飛腳最終未能攻破漩渦，踢成0:0完場，但多得鯨魚幫手，令到紅鑽失分，他們得以1分力壓紅鑽，以63分奪得今季日聯錦標。飛腳今季以升班馬姿態，劍指日本3冠王，他們早前奪得日聯盃，昨日又在日聯封王，已經通過頭兩關，周六就會在日皇盃決賽鬥山形山神。
另外，鹿角雖以0:1不敵砂岩，但其第3名、出戰明年亞冠盃的資格都十拿九穩，除非柏雷素爾可以在補賽以極大比數擊敗新潟天鵝。
文：咖喱
識睇，一定係睇足英台【英波Live】：
http://soccer.appledaily.com
http://bit.ly/engballlive