又係年尾，又有人討論話樂壇頒獎禮乜乜乜，取消啦合併啦，好多意見。儍嘅，獎呢啲嘢其實點會嫌多箒，家陣嘅香港，應該頒多啲獎就真！
有資深樂迷分析話，Eason新歌出唔切所以冇乜獎攞。係咩？但係我見呢個星期人人講緊MAMA個concert入面，Eason好似變咗香港代表隊1個鬥10個喎，場邊啲專家仲話佢技壓群雄，直頭係用廣東話教韓國對手唱歌咁話喎，場地唔同，但係就同曹星如單人匹馬穿州過省打拳一樣，不過一個用口，一個用手啫！
身處呢個大時代，大家都可能需要多啲心靈雞湯，歌又好，波又好，譚校長話齋：「一首好歌啟發向上」但萬一新歌唔夠多，好波一樣可以觸摸你心窩！咁多年嚟當你慨嘆命運就算顛沛流離，命運就算曲折離奇嘅時候，以前一首《紅日》幫到你，𠵱家當克勤都忍唔住走入後台為曹星如頒獎同影相，就知道運動其實從來都係香港人嘅心靈雞湯，以前係，家陣更加係。
樂壇頒獎禮唔該照搞，但可以嘅話請搞得貼近生活些少，除咗頒發各項交差嘅獎項外，不妨整幾個冇實質數據，但有無形貢獻嘅獎項，例如最有體育精神歌手獎，嗱，候選歌手嘅入圍要求好簡單，就係不斷耕耘，但不問收穫嘅，應該唔少啩。又可以整番首最激勵人心金曲，入圍仲簡單，喺街頭訪問香港人，心情低落時會掛喺口邊嘅歌就啱條件，咁如果又係《相逢何必曾相識》都無壞吖，好歌就係可以歷久常新，冇新舊之分。
查實香港地各行各業都好需要畀多啲獎勵。冇獎唔代表你唔叻，但一個多謝，一句恭喜確實可以畀到唔少朋友仔應有嘅名份，由一身孭5個袋衝入閘嘅速遞員，到快問快答嘅快餐店收銀，個個喺自己崗位都係做足100分，佢哋冇人留意冇獎攞嘅原因，只不過係因為身處嘅位置唔係樂壇啫！
KEYMAN
節目主持