雨傘運動儼如一塊照妖鏡，就連娛樂圈亦出現撕裂現象，有導演為五斗米而向阿爺獻媚；亦有藝人不怕封殺，默默支持學生，何韻詩正是後者。於各佔領區中有不少打氣標語，其中「生於亂世 有種責任」更隨處可見。其實這句是何韻詩歌曲《艷光四射》中的一句歌詞，阿詩覺得冥冥之中自有安排：「嗰首係向我師傅梅艷芳致敬嘅，佢從來都係為公義發聲嘅女俠。」看來阿詩在梅姐身上學到的不止台上風采，還有不怕為公義發聲的傲骨。
撰文：文國駿
何韻詩早前跟美髮品牌VS Sassoon（沙宣）合作，髮型師更為此替她剪了一頭短髮，她日前接受本報專訪說：「髮型簡單，同我性格好似。」阿詩在雨傘運動中表態，不怕被封殺而影響工作，談到「生於亂世 有種責任」被用作打氣標語，阿詩謂：「喺呢個運動入面無意中俾人拎嚟做振奮士氣口號，係無心插柳，可能命中自有安排，因為首歌本來就係用嚟向一個從來為公義發聲嘅女俠致敬，好玄妙。」
她又謂不怕影響收入，因為自己一向是簡單生活的人：「我一向好易養，唔係好買嘢，買得最多係書。我由幾年前對香港有抗拒，冇歸屬感，到𠵱家因呢件事搵返個連接係開心嘅，再連接係好珍貴，我好珍惜今次同香港refriend返，呢個亦都係我呢個幾月嘅最大得着。」
聽從自己的心做事
阿詩不諱言自己曾被多年的演藝星途潛移默化：「做藝人時有人幫我book車，好照顧我，有啲離地，𠵱家有個咁嘅機會畀我剝埋最後一層，最真誠咁行返入社會，係我真正想做嘅嘢。」阿詩又笑言自己應該做社工而非歌手：「我今次可以同唔少年輕人傾偈，你會發現原來你以為係終身職業，但原來嗰個只係前菜，可能會有更精采嘅事等緊你，世事唔好諗得咁絕對。隨心囉，你嗰一刻想去做就做啦，個天真係會有安排，你自自然然就知道會點做，我都係呢兩年先學識聽從自己個心做事。」
了解不足 終身學習
阿詩表示今次事件可算為自己人生開了新一章：「我以前諗嘢方式圍住藝人呢個身份，說話會有考量。今次我冇辦法喇，一定要行出嚟講，會發覺原來呢個世界係好大㗎。我有諗過係咪可以讀書呢？人最怕係太自以為是，太喺自己空間入面，最怕去到一個位置以為可睇通所有嘢，尤其呢個月好多情況我未面對過，會睇到自己嘅不足，好似我應該再有多啲知識先handle到某啲事情。其實呢一班年輕人學生令我明白咗要永遠保持學習心態，成年人成日覺得累積咗一啲經驗同知識可以教年輕人，但其實世界永遠向前滾動緊。我真係想做學生，或者社工，我能屈能伸，做茶水都OK。」有人說這是香港最壞的年代；亦有說很多公民覺醒，是香港最好的年代，問阿詩怎看？她說：「好同壞從來都係共存，而我哋亦正正需要唔同聲音，最怕係全部人都同一思維，咁就會好恐怖，有時分歧可以令件事進步，最緊要和平表達。」
