今期冇心水？不如睇睇近七季國際賽前之田戰，徐雨石成績超卓，六次有馬贏共取九W，其中八場贏泥地，1200米更佔其七，反映他對泥地短途情有獨鍾。今期又是國際賽前之田戰，由二至五班，各有一場泥地1200米編排，徐廐每場均有馬列陣，當中四班的「偉寶之星」有保護權在身，三班的「頌友」及五班的「龍城動力」則齊打王牌，部署上擺明以今仗為目標，勢必擔當馬房出擊主力。
第二場「龍城動力」曾在78分贏同程泥地1200米開齋，如今減至39分，比最近一次取勝僅高一分，重返一戰即勝之五班即打王牌，搏殺之心不言而喻。第七場「偉寶之星」最高曾於58分上名，如今57分有發揮空間，泥地1200米入圍次數多，今季未交代，回師泥地必有爭勝決心。第八場「頌友」近五戰獲一W三P全跑同程泥地1200米，泥地累積十戰三勝四位，今季未甩過Q，值得繼續倚重。