今期(7日)第九場三班1000米直路賽，最受注目應係「駿步蹄聲」及「幸運明星」，呢對馬曾喺上月2日同一路程較量，結果分別跑冠、亞軍，今次再度碰頭，其中「幸運明星」在港只跑過一次，當然仲有好多進步空間，不過要留意當日佢排14檔，喺直路賽屬於靚檔，結果仍要輸畀排三檔衰位，嘥咗一啲腳程同時間向外切入埋欄嘅「駿馬蹄聲」，而「駿步蹄聲」臨尾其實越贏越遠，可見兩駒實力有距離。
今次調番轉，「駿步蹄聲」排12檔靚位而「幸運明星」一檔衰位，睇怕「幸運明星」唔易反先。
不過「駿步蹄聲」有樣風險要衡量，呢匹馬嘅健康似乎唔太穩定，今季兩次出賽後，都被發現氣管有大量血液，季初亦試過晨課操完右前蹄不良於行，可以話周身唔妥，幸好今次賽前備戰尚算完整，並冇缺課。呢類傷患馬今日唔知聽日事，一般嚟講練馬師都唔會保留，出得賽砌得就砌，鬥志反而比其他馬鮮明，加上騎師李寶利冇耐前先同苗禮德合作贏「大將風馳」，老苗向來信任呢位意大利好手。所以「駿步蹄聲」就算健康有疑點，但質高加上幕後心態今朝有酒今朝醉必拼，仍然係今場機會最高一駒。