深圳龍華鎮首富，身家過百億的「金珀龍華」馬主謝國輝又抱孫。記得10月19日，謝國輝大子謝劍鋒再為人父，太太誕下女兒，湊成一個好字。估唔到唔夠兩個月，輪到謝劍鋒細佬阿John謝劍汶弄瓦之喜，佢嘅靚靚太太喺12月6日(今日)凌晨1時18分，同樣誕下千金，肥嘟嘟萌爆超可愛，並已改了個英文名Katrina，而且阿John亦係同大佬一樣，再為人父一子一女，可謂非常完美。
謝氏一家喜氣洋洋，阿John話睇住個女出世一刻好感動，真係辛苦晒太太，一定會好好愛錫家人。阿John會否為Katrina擺滿月抑或百日宴，暫時仲未知，但佢老竇謝國輝就早已決定於本月18日宴開65席，邀請多位姓「謝」嘅宗親共聚一堂，事關謝國輝本身是全球謝氏總會主席，亦是香港謝氏宗親會榮譽會長，呢個宗親總會設有一個「謝氏基金」，目的是希望大家老有所依。唔知本月18日嘅宴會，阿John會唔會同Katrina一齊出席，見下啲世叔伯呢？
至於John自己隻「龍華太旨」，將會喺下周三(10日)出賽跑三班谷草1000米，呢匹馬上季五捷旺到爆，經過一輪回氣後，上仗泥地不合亦得第五，已有回勇跡象，今次轉爭一戰即獲亞軍嘅谷草1000米，隨時可以贏馬賀John做爸爸。