「女神！女神！」噚日喺藍田南體育館舉行嘅校際羽毛球賽（九龍區）決賽，女神之聲此起彼落，講緊嘅係協恩中五生吳芷柔。自贏青奧混雙金牌後被封為女神嘅佢，噚日喺甲組單打由4強到決賽，都未失一局，助母校擊敗德望同女拔，以勝利告別學界賽；下月開始將成為全職運動員。
助協恩6連霸
人如其名，平時打波同講嘢都好溫柔嘅吳芷柔，就算噚日告別學界賽，都冇話好激情咁樣，佢話：「我打咗5年學界都冇激情嘅表現，人哋話我淡定冷靜。可能係我嘅習慣啦，好少喺場上表現得大起大落。其實我好唔捨得，唔捨得同協恩同學喺學校嘅點滴，亦好開心可以喺協恩5年，連續5年攞到呢個比賽冠軍。」噚日呢個甲組冠軍，係芷柔嘅5連勝，亦係協恩嘅6連勝。
講真就真係要讚一讚協恩，佢哋喺呢個中學校際羽毛球賽（九龍區）對上5年，包辦甲、乙、丙3組冠軍兼總冠軍，今年爭唔爭到「6連冠」（包括各組別冠軍同總冠軍）， 等埋下月丙組就自有分曉。
協恩羽毛球咁犀利，主要係學校有唔少現役羽毛球青年軍，好似甲組就有吳芷柔、楊雅婷同黃煥茵。
至於男子組嘅競爭就激烈好多，甲組由男拔贏冠軍，乙組冠軍就由喇沙取得。
識睇，一定係睇足英台【英波Live】：
http://soccer.appledaily.com
http://bit.ly/engballlive