「雄」魔？心雄個雄囉！前排曼聯開季衰過上年，成班花生友即刻揶揄領隊雲高爾連莫耶斯都不如；𠵱家紅魔喺聯賽4連勝上番前4，雲高爾即刻變番「戰術大師」，球會高層仲好放心咁科水成1.5億鎊（約18.2億港元）過佢買人。
雲帥再吼荷蘭舊部
英國《每日郵報》披露，曼聯高層認為球會向緊正確方向邁進，決定下年夏天甚至最快冬季豪擲1.5億鎊，話要仿傚皇家馬德里咁打造星級陣容喎。收購對象方面（見附表），雲高爾最不滿球隊嘅中堅、右閘同翼鋒，於是向荷蘭舊部打主意，好似吹足成年嘅羅馬中場史杜特文，仲有拜仁翼鋒洛賓；中堅亦係「補完」重點，包括馬體會嘅高甸同多蒙特嘅曉姆斯，最估你唔到係巴塞右閘丹尼爾，唔通想學AC米蘭咁簽吓免費兵？
有人嚟自然有人去，據講率先喺1月走人嘅會係後備門將連迪加特；至於巴西中場路爾斯安達臣，會方寧願由得佢坐到出年夏天約滿，都要慳番140萬鎊賠償金！仲有一班借走咗嘅拿尼、湯卡華利、查維亞靴南迪斯、韋費特沙夏同尼克包維都應該唔使返嚟。不過下年個歐聯資格有排都未穩陣，買咁多人，都要有咁多波踢先得㗎！
識睇，一定係睇足英台【英波Live】：
http://soccer.appledaily.com
http://bit.ly/engballlive