民主黨議員胡志偉隨佔中三子自首，暫時仍然係自由身，噚日下午大約兩點鐘，有班大叔大媽，去到慈雲山富山邨富信樓地下胡志偉議員辦事處門外，目擊者話大約有20名大叔大媽殺到，街坊初時唔知佢哋做乜鬼，後來見到佢哋舉起抗議紙牌兼大嗌口號，先知道原來係示威，不過班人只係逗留數分鐘，就快閃離去。
富山邨係胡志偉老巢，膽敢踩入白鴿基地，八方相信佢哋都唔係泛泛之輩，據悉，佢哋係「紫荊行動」成員，即係邊路人馬？總之係親建制、藍絲啲friend啦。據講佢哋不滿胡志偉同其他泛民議員，接待學聯、學民成員入立法會留宿，所以到場鳩嗚抗議。 胡志偉就話多謝左報，因為早已預告，所以提醒同事注意，「咪由得佢哋囉！」